Fjárhagsniðurstöður

Hagnaður Arion banka á árinu 2014 nam 28,6 milljörðum króna eftir skatta samanborið við 12,7 milljarða króna árið 2013. Arðsemi eigin fjár var 18,6% samanborið við 9,2% árið 2013. Heildareignir námu 933,7 milljörðum króna samanborið við 938,9 milljarða króna í árslok 2013. Eiginfjárhlutfall bankans í árslok var 26,3% en var 23,6% í árslok 2013. Þá var hlutfall eiginfjárþáttar A 21,8% í árslok 2014 en var 19,2% í árslok 2013.

Rekstrartekjur

Rekstrartekjur hækka talsvert á milli ára eða um 9.642 milljónir króna en þær námu 53.990 milljónum króna á árinu. Hækkunin er einkum tilkomin vegna 3.037 milljóna króna hækkunar á hreinum fjármunatekjum, 2.578 milljóna króna viðsnúningi á hreinum gengishagnaði og 2.086 milljóna króna hækkunar á hreinum þóknanatekjum.

Hreinar vaxtatekjur námu 24.220 milljónum króna á árinu og hækka um 2% milli ára. Vaxtamunur af meðalstöðu vaxtaberandi eigna nam 2,8% á árinu en var 2,9% á árinu 2013. Þrátt fyrir lægri verðbólgu, sem áhrif hefur á verðtryggðar eignir, er vaxtamunur svipaður og skýrist það einkum af lægri fjármagnskostnaði með virkari lausafjárstýringu.

Hreinar þóknanatekjur aukast um tæp 19% milli ára og námu 13.309 milljónum króna á árinu 2014. Aukningin er að mestu tilkomin vegna hærri þóknanatekna af greiðslukortum og af auknum umsvifum á fjárfestingarbankasviði.

Hreinar fjármunatekjur hækkuðu mikið milli ára og námu 6.478 milljónum króna á árinu 2014 samanborið við 3.441 milljónir króna á árinu 2013. Mestu munar þar um uppreikning á eignarhlut í HB Granda hf. en félagið var skráð á NASDAQ Íslandi í apríl 2014. Almennt var ávöxtun hlutabréfa með ágætum á árinu en verð á skuldabréfum átti nokkuð undir högg að sækja. Arðstekjur voru 829 milljónum króna hærri á árinu 2014 en árið 2013. 

Aðrar rekstrartekjur námu 9.171 milljón króna á árinu og hækka töluvert frá fyrra ári. Aðrar rekstrartekjur eru einkum tekjur af hlutdeildarfélögum, leigutekjur, virðisbreytingar og söluhagnaður af atvinnuhúsnæði í eigu Landfesta ehf. (fyrrum dótturfélags bankans) og Landeyjasamstæðunnar og tekjur af iðgjöldum hjá OKKAR líftryggingum hf. Hækkun samanborið við fyrra ár skýrist einkum af mun meiri hagnaði og virðisbreytingum af hlutdeildarfélögum en hækkunin nemur 1.512 milljónum króna. Leigutekjur fjárfestingareigna lækka umtalsvert milli ára með brotthvarfi Landfesta ehf. úr samstæðunni á miðju ári.

Rekstrarkostnaður

Rekstrarkostnaður ársins nam samtals 27.042 milljónum króna. Kostnaðarhlutfall lækkar í 50,1% en var 57,3% árið 2013. Kostnaður sem hlutfall af eignum nam 2,9% en var 2,8% árið 2013. 

Laun og launatengd gjöld námu 13.979 milljónum króna og hækka um 3% á milli ára. Hluti hækkunarinnar kemur til af samningsbundnum hækkunum upp á 2,8%, hærri kostnaði vegna kaupaukakerfis og einskiptiskostnaði vegna fækkunar starfsmanna. Stöðugildi samstæðunnar voru að meðaltali 1.128 á árinu 2014 samanborið við 1.159 árið 2013. 

Annar rekstrarkostnaður nam 13.063 milljónum króna og hækkar um 10% milli ára. Umtalsverður einskiptiskostnaður vegna niðurfærslu eigna og sekta frá Samkeppniseftirlitinu skýrir þessa hækkun frá fyrra ári að mestu.

Hrein virðisbreyting

Hrein virðisbreyting á árinu nam 2.135 milljónum króna og skiptist í stórum dráttum í þrennt. Í fyrsta lagi er um að ræða hreina virðishækkun á lánum til fyrirtækja upp á 2.300 milljónir króna. Í öðru lagi er hrein virðisrýrnun vegna útlána til einstaklinga um 851 milljón króna. Í þriðja lagi er hrein virðishækkun annarra eigna 686 milljónir króna.

Skattar

Tekjuskattur nam 4.679 milljónum króna samanborið við 3.143 milljónir króna árið 2013. Tekjuskattur, eins og hann er settur fram í ársreikningi, samanstendur af 20% tekjuskatti af hagnaði og 6% sérstökum fjársýsluskatti sem lagður er á hagnað fjármálafyrirtækja umfram einn milljarð króna. Virkt tekjuskattshlutfall er 16,1% á árinu 2014 samanborið við 17,2% árið 2013. Bankaskattur nam 2.643 milljónum króna samanborið við 2.872 milljónir króna árið 2013. Tekju- og bankaskattar nema því samtals 7,3 milljörðum króna samanborið við 6,0 milljarða króna á árinu 2013.

Aflögð starfsemi

Hagnaður af aflagðri starfsemi nam 6.833 milljónum króna á árinu. Í apríl sl. seldi bankinn 18,8% hlut í HB Granda hf., en bankinn átti fyrir söluna 31% hlut, og er stærstur hluti þessa hagnaðar tilkominn af þeirri sölu. Í kjölfar sölunnar og skráningar félagsins á markað var eignarhlutur bankans fluttur undir verðbréfaeign og tekur hann verðbreytingum í samræmi við skráð gengi. Þær virðisbreytingar flokkast undir hreinar fjármunatekjur í rekstrarreikningi.

Efnahagsreikningur

Heildareignir samstæðu Arion banka námu 933.736 milljónum króna í árslok. Breytingar á einstökum eignaflokkum á árinu eru einkum vegna breytinga í lausafjárstýringu bankans sem tengjast m.a. nýlega innleiddu lausafjárhlutfalli, LCR. Þessi breyting birtist m.a. í lægri innstæðum hjá Seðlabanka Íslands, hækkun á lánum til lánastofnana og aukinni verðbréfaeign. Þá var nokkuð um nýjar lánveitingar á árinu, bæði til einstaklinga og fyrirtækja í sjávarútvegi, fasteignarekstri og iðnaði. Fjárfestingareignir lækka talsvert á árinu vegna sölu á dótturfélaginu Landfestum ehf. og lækkun á fastafjármunum til sölu og aflagðri starfsemi er að mestu tilkomin vegna sölu á eignarhlut bankans í HB Granda hf.

Lán til viðskiptavina

Lán til viðskiptavina námu 647.508 milljónum króna í árslok. Frá árinu 2010 hefur lánabók samstæðunnar stækkað umtalsvert og tveir atburðir skýra einkum þá stækkun. Í fyrsta lagi kaup bankans á Arion Bank Mortgages Institutional Investor Fund í árslok 2011, og í annan stað þegar bankinn eignaðist einstaklingslán sem veitt voru af SPRON að virði ríflega 50 milljarða króna í árslok 2013. Íbúðalán eru stór hluti af lánum til einstaklinga og umtalsverður hluti þeirra er áhættulítil lán með mjög góða veðstöðu. 

Lánasafn samstæðunnar er vel dreift. Um helmingur þess er lán til einstaklinga og hinn helmingurinn er til fyrirtækja í hinum ýmsu atvinnugreinum og er skiptingin í takt við samsetningu íslenska efnahagsumhverfisins.

Verðbréfaeign

Verðbréfaeign nam 101.828 milljónum króna í árslok samanborið við 86.541 milljónir króna í árslok 2013. Hækkunin er einkum tilkomin vegna breytinga í lausafjárstýringu bankans á árinu og viðbótar í hlutabréfastöðu, m.a. vegna endurflokkunar á eignarhlut í Eik fasteignafélagi hf. og skráningar og endurflokkunar á eignarhlut í HB Granda hf.

Óefnislegar eignir

Óefnislegar eignir námu 9.596 milljónum króna í árslok samanborið við 5.383 milljónir króna í árslok 2013. Hækkunin er tilkomin vegna kaupa dótturfélagsins Valitor Holding hf. á dönsku félagasamstæðunni AltaPay A/S. Tilgangur kaupanna er að styðja við stefnu Valitor í uppbyggingu á starfsemi félagsins á Norðurlöndunum á sviði netviðskipta.

Skuldir

Heildarskuldir námu 771.524 milljónum króna í árslok samanborið við 793.903 milljónir króna í árslok 2013.

Innlán

Heildarinnlán námu 477.849 milljónum króna í árslok og lækka nokkuð milli ára, sem skýrist að mestu leyti af stórum hreyfingum í tengslum við umfangsmikil viðskipti á íslenskum markaði á lokadögum ársins 2014.

Lántaka

Snemma á árinu 2014 fékk bankinn lánshæfiseinkunn frá alþjóðlega lánshæfisfyrirtækinu Standard & Poor‘s, fyrstur íslenskra banka í ríflega fimm ár. Einkunnin BB+ var svo staðfest af lánshæfisfyrirtækinu í október sl. og horfum bankans breytt úr stöðugum í jákvæðar. Þetta lánshæfismat, ásamt jákvæðum horfum, mun auka möguleika bankans á innlendum og alþjóðlegum lánsfjármörkuðum á næstu misserum.